लटिका राग

प्रिये फुलली हि वाटिका
सुंदर हि घटिका
दूर उभी राहुनी
अबोल तू अशी का

नुकतीच बरसली श्रावणसर
सोनेरी उन्हे पसरली भूवर
फुलांवर पानांवर मनावर
सुगंधात मृत्तिका

तुझ्यासवे कसे बोलावे
ह्या रागाला काय म्हणावे
का असे रोखुनी बघावे
फुगवुनी नासिका

फुल डोलते वाऱ्यासंगे
भ्रमारासावे प्रणय रंगे
प्रीतीच्या गुजगोष्टीत दंगे
तरुसवे लतिका

किती वेळ राहणार अजुनी
तळहाती हनुवटी ठेवुनी
मधेच हसते ओठ दाबुनी
सोड राग हा लटिका